Hiji mangsa aya hiji Ustad rek ngajual motor. Teu lila jol si Kabayan hayang meuli motor ustad eta. Ngan samemeh creng dibayar, si Kabayan keukeuh hayang test drive heula. Atuh Ustad teu bisa kumaha, ngan samemeh mikeun konci motor.
Ustad mapatahan, "Kade motor ieu mah. Mun ngahirupkeun kudu maca bismillah, lamun maju lalaunan kudu maca Subhanallah, lamun hayang ngebut kudu maca Alhamdulillah, lamun hayang ngerem jeung eureun kudu maca Allahu Akbar!"
Si Kabayang sanggeus dipapatahan teu talangke. Clak, manehna naek kana motor.
"Bismiilah...!", ceuk manehna bari ngontakeun konci motor. Gerung eta motor mesinna hurung. Terus digas, teu maju. Digas tarik naker teu maju oge.
"Baca Subhanallah atuh!", ceuk Ustad nyarita rada tarik da sorana katutup ku sora knalpot motor.
"Subhanallah!", ceuk si Kabayan nurut. Enya we. Geleser eta motor maju lalaunan.
"Alhamdulillah!", ceuk si Kabayan, nyarita da hayang ngajaran ngebut tea. Belesat eta motor, maju tarik. Pedah hayang ngebut apeng-apengan, si Kabayan hantem maca "Alhamdulillah!".
Motor ngembut tari naker, Si Kabayan panik, jadi poho kudu ngomong naon lamun motor hayang eureun. Nya manehna nyebutan, omongan anu tadi dibejaan ku Ustad.
"Bismillah!", motor anger ngebut tarik pisan! Si Kabayan beuki tagiwur, kabur pangacian.
"Subhanallah!" motor anger maju ngan rada ngalaunan! Ngan orokaya sihoreng jalan anu rek kaliwatan sasakna runtuh. Mangkaning jurang meni jero naker. Kabayan reuwas pisan jeung geus teu inget nanaon. Akhirna manehna maca takbir, da disangkana rek maot tigebrus ka jurang anu sakitu jerona.
"Allaaaahu Akbar!", ceuk si Kabayan ngajorowok tarik pisan.
Reg... sapada harita motor eureun. Persis dina tuntung jalan, sisi jurang pisan.
Bakat ku atoh, pedah salamet. Si Kabayan, ngucap syukur: "Alhamdulillah!"
No comments:
Post a Comment